جوبايډن د امریکا د پخواني جمهور رییس بارک اوباما مرستیال او اوسمهال د ډیموکرات حزب له کاندیدانو څخه هغه دی چې په یوه خپل منځي حزبي مناظره کې يې ويلي دي: «زه په افغانستان کې د ملت جوړونې سخت مخالف وم. یوازينی کار چې باید په هغه سيمه کې يې ترسره کړو، له تروریزم سره مبارزه ده ... د دغه هېواد د یووالي هېڅ امکان نشته، هېڅ شونې نه ده چې افغانستان په يوه متحد هېواد باندې بدل شي.»

د حزب التحریر - ولایه افغانستان مطبوعاتي دفتر دغه خبرې په سختو ټکو غندي او په اړه يې وايي چې د دغه خاورې وګړي د استعماري پروګرامونو او اشغال پر وړاندې همېشه متحد او سره یو وو. حال دا چې دا ملت جوړونه او د ملي فکر پر بنسټ حللارې دي چې له ځان سره د تفرقې او بېلتون پیغام راوړي. جوبایډن داسې مهال دغه فاسده، بې کاره او ورسته مفکوره د یووالي او وحدت د نسخې په توګه یاده کړې چې د دولت-ملت مفکوره د دې لامل شوې چې مسلمانان خپل ډال او عظمت (د خلافت واحد دولت)، له لاسه ورکړي او په وړو او کوچنیو واحدونو باندې ووېشل شي.

په واقعیت کې جوبايډن د هغه حللارې په اړه خبرې کوي چې د تولیدوونکو لپاره یې هم ښې پایلې نه دي درلودلې. دا ملت پالنه نه ده چې د امریکا ایالتونو ته یې يووالی ور په برخه کړی، بلکې دا د دښمن جوړولو سیاست او له بهرني دښمن نه وېره ده چې امريکا يې سره یوه کړې ده. لکه څنګه چې په دې وروستیو لسیزو کې امریکا، اسلام خپل ولس ته د تهدید په توګه ور وپېژاند او د اسلام پر وړاندې جګړه يې «د تروریزم پر وړاندې د جګړې» تر نوم لاندې پیل کړه، ترڅو ټول ایالتونه یې د مرکزي حکومت پر محور راټول شي؛ پرته له دې به امریکا هم ډېره ژر په تر پنځوسو ډېرو ایالتونو وېشل شوې وای.

غرب کلونه-کلونه د بېلابېلو لارو چارو په واسطه هڅه کړې ترڅو موږ کوچني او لا هم ډېر کوچني کړي او د دغه موخې لپاره یې د تجزیې بېلابېل پروګرامونه او نقشې تر کار لاندې نيولې دي. مګر د افغانستان مسلمان وګړي په ټول توان سره دغو پروګرامونو ته نه ويلي او دا ډول ناوړه پلانونه يې شنډ کړي دي.‌

مسلمانان هېڅ کله هم د هغو حللارو پر محور نه سره راټولېږي چې د اسلام له مبداء (ایډيولوژۍ) څخه نه وي. له همدې امله ده چې ملي پروژې او د دولت-ملت جوړونه د مسلمانانو ترمنځ ناکامه او پر ماتې محکومه وه. نو یوازينۍ حللاره چې مسلمانانو ته وحدت او عزت وربښي اسلام او د اسلامي امت مفکوره ده. مسلمانان یوازې د واحد امت په تمثیل او د راشده خلافت د دولت په بیا تاسیس سره کولای شي خپل اصلي عظمت او لوړوالي ته وروګرځي.

د حزب‌التحریر - ولایه افغانستان مطبوعاتي دفتر