د ایران پوليسو ۵۸ افغانان له شکنجې وروسته سمندر ته غورځولي دي. یو ژغورل شوی کس وایي چې د ایران پوليسو نوموړی او ۵۷ ملګري يې چې د ایران خاورې ته يې د ننوتو نیت درلود، له شکنجې وروسته سمندر ته غورځولي دي. د هغه په وینا يوازې ۲۳ کسان ژغورل شوي دي.

د حزب‌التحریر – ولایه افغانستان مطبوعاتي دفتر دغه عمل په خورا سختو ټکو غندي او د دې ویرجنې پېښې په اړه لاندې ټکي د يادونې وړ بولي:

لومړی: افغانستان یوه بډایه اسلامي خاوره ده چې منګی يې له اوبو ډکه دی؛ خو خپله له تندې مري. افغانستان سرشاره طبیعي سرچینې لري؛ خو د چارواکو د عذر او د استعمار د حاکمیت له امله هېڅکله دا فرصت نه دی ورکړل شوی او نه يې ورکوي، ترڅو پر خپل ځان یو متکي هېواد شي او له خپلو سرچينو سمه ګټه واخلي. سياسي او اقتصادي تړښت د غربي استمعار یو اسلوب دی چې پر اسلامي خاورو تپل شوی. له همدې امله د دې خاورې میلیونونه ځوانان د فقر او يوې ګولې ډوډۍ د لاسته راوړلو له امله نورو هېوادونو ته کډوال کېږي. د افغانستان خاین چارواکي هم چې په اشغال او استعمار پورې تړښت د ځان لپاره یو ډول ویاړ ګڼي، له يوې خوا دغه هېواد ته په راتویې شوو پيسو او عوايدو خپله خېټه ډکوي او له بلې خوا يې اقتصادي پلانونه او پروګرامونه هم خيالي او دروغ دي! دغه مفسد چارواکي هڅه کوي چې د خلکو له فقر او بېکارۍ ناوړه ګټه واخلي او خپل حاکمیت ته دوام ورکړي.

دویم: د ایران دولت د «اسلامي جمهوریت» له تشکیل راهيسې هڅه کوي چې ځان د اسلامي نړۍ لپاره سياسي محور، نمونه او قبله وګرځوي؛ خو دغه دولت په هغو لوړو شعارونو چې درلودل يې، نه يوازې دا چې د نړۍ د مسلمانو د ټپ پټۍ نه شو، بلکې د چټلو امريکايي سياستونو په پيروۍ يې د نړۍ د مسلمانانو پر وړاندې ستر خیانتونه ترسره کړي دي. د همدغو سياستونو په پايله کې په افغانستان، سوريه، عراق، یمن او نورو خاورو کې میلیونونه مسلمانان د باروتو سرو لمبو ته تړل شوي دي او تړل کېږي. نو سمندر ته د افغان ځوانانو غورځول د دغه تش په نامه اسلامي دولت د همغو غیر انساني او غیر اسلامي سياستونو دوام دی.

درېيم: له هغه مهاله چې اسلامي نړۍ د دولت - ملت په غېږ کې سقوط وکړ او د استعمار په مرزکښیو ټوټه ټوټه شو، دا ډول غميزې يې په ځلونو تجربه کړې دي. د ملي دولتونو په تشکیلېدو د امت او اخوت (ورورولۍ) مفکورې لمن ټوله شوه او دولتونه د سیکولري فکر او ملي ګټو پر بنسټ جوړ شول، چې د ایران ظالم دولت هم د هغو برخه دی. د ملي ګټو ليدلوري مسلمانان داسې یو د بل پر وړاندې درولي دي چې پر بنسټ يې يو افغانی د پاکستاني او یو ایرانی د افغاني قتل توجيه کوي او ورباندې وياړي. نو دا ظلم، فساد او غميزې هغه مهال پای مومي چې د عواملو جرړې يې وایستل شي. دا عوامل همدا ملي دولتونه، ملي پولې، غیر اسلامي نظامونه او... دي چې پر اسلامي نړۍ تپل شوي او د مسلمانانو د تجزیې لامل شوي دي.

موږ کلونه کېږي چې اسلامي امت ته د دا ډول مفکورو له خطرونو خبرداری ورکوو او تر ننه پورې مو هڅه کړې چې اسلامي نړۍ خپل اصل ته چې اسلام دی، ور وګرځوو او د خلافت واحد دولت په تاسیس د دغو ټولو زهري او خطرناکو مفکورو جرړې وباسو او د مسلمانانو تر منځ فکري، سياسي او جغرافيايي وحدت رامنځته ته کړو.

د حزب‌التحریر - ولایه افغانستان مطبوعاتي دفتر