د رژیم لخوا د ٢٢ کلنې مهسا امیني تر وژلو وروسته، چې د راپورونو له مخې د حجاب نه پر سرولو په جرم د پولیسو په توقیف کې وژل شوې، په دغه هېواد کې د روانو پېښو ځینو مهمو ټکو ته اشاره کوو:

1. د مهسا امیني وهل د اسلام له نظره حرام کار دی. اسلام هر ډول ډول شکنجه منع کوي. دا په اسلامي نصوصو کې روښانه ده. رسول الله صلی الله عليه وسلم فرمايي:

إِنَّ اللهَ يُعَذِّبُ الَّذِينَ يُعَذِّبُونَ فِي الدُّنْيَا

ژباړه: « هغه خلک چې په دې نړۍ کې خلک ربړوي، الله تعالی عذاب ورکوي».

1. 2.    په ایران کې د پخوانۍ دورې ډېر شمېر سیکولاران شته چې د پخوانیو مستشرقينو په څېر پر اسلام تورونه لګوي، په حجاب او اسلامي ټولنیزو احکامو پسې درواغ تړي او اسلام تورنوي چې ګواکي پر ښځو يې ظلم کړی. مثلاً د سپټمبر په ۲۳مه په Britain’s Times ويبپاڼه کې د یوه خبریال، جینس ټرنر مقاله خپره شوې چې سرلیک یې «که حجاب را وپرځېږي، د ایران ظالم رژیم به ورپسې پرځېږي». د متن یوه برخه یې داسي ده: «حجاب يوازې د جامو یو اصل نه دی، بلکې یو ډول کنټرولوونکې وسيله ده چې د ټول ملت ترمنځ د ويرې خپرولو او نفاق رامنځته کولو لپاره طرح شوې». دا خبره ډېره بې ځایه ده چې اسلامي حجاب د ایران په څېر ظالمو حکومتونو په دوام کې مرسته کوي. دا ډول تورونه د نړۍ او نورو کلتورونو په اړه له بې بنسټه، اسلام ضد او اروپايي محوره لید څخه راپورته کېږي او باید په لوړ آواز يې پر وړاندې مبارزه وشي.
2. دا خبره چې ګواکي د ایران رژیم د اسلامي احکامو پلي‌کولو او ساتني ته ارزښت ورکوي، بېځایه ده. دا هغه رژیم دی چې له قصاب اسد سره یې د لسګونو زرو بیګناه سوري مسلمانانو په ټول‌وژنه کې مرسته کوله او لاسونه يې د یمن او عراق مسلمانانو په وینو رنګ دي. دوی همداراز هغه افغانان وژلي چې د ښه ژوند په لټه کې د دوی خاورې ته ور اوړي. رسول الله صلی الله عليه وسلم فرمايي:

«كُلُّ الْمُسْلِمِ عَلَى الْمُسْلِمِ حَرَامٌ؛ دَمُهُ وَمَالُهُ وَعِرْضُهُ»

ژباړه: د مسلمان وینه، شتمني او عزت پر نورو مسلمانانو حرام دي. (رواه مسلم)

1. داسې کسان شته چې په ایران کې د ښځو پر وړاندې د شته ستونزو لامل د حجاب او نورو اسلامي ټولنیزو اصولو پلي کول او د جنسیتي برابرابرۍ نه شتون بولي. په داسې حال کې چې اصلي لامل یې د ایلان تئوکراتیک رژیم دی چې د قران او سنتو د احکامو پر ځای د آخوندانو د غوښتنو او احکامو له مخې چلېږي. هر نظام، که هغه دیکتاتوري وي که ډيموکراسي، چې د انساني هوس او غوښتنو پر بنسټ حکومت وکړي، پایله به یې پر خلکو ظلم او له اساسي حقوقو څخه محروميت وي. الله سبحانه وتعالی فرمايي:

(وَمَن لَّمْ يَحْكُم بِمَا أنزَلَ اللّهُ فَأُوْلَـئِكَ هُمُ الظَّالِمُونَ)

ژباړه: او كوم خلك چي د الله د نازل کړي قانون سره سمه فېصله ونه کړي، هغوى ظالمان دي. [ سوره المائده: 45]

1. د ایران له ظالم او جابر رژیم څخه د خلکو ناخوښي د درک وړ ده. خو په دغو لاریونونو کې ولې ځيني مسلمانې ښځې خپل حجابونه سېځي او په په عام محضر کې ناڅي؛ ولې خپله ناخوښي او غوسه د الله تعالی -د دوی خالق او رب- د احکامو پر وراندي ښکاره کوي؟ له لاسونو او مخ پرته، د ښځې ټول بدن باید پټ وي او نامحرم یې ونه ویني؛ دا د ایران یا کوم بل رژیم امر نه، بلکې د الله سبحانه و تعالی امر دی چې په قران او سنتو کې روښانه راغلی. الله سبحانه وتعالی فرمايي:

وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء

ژباړه: او [اې پېغمبره (ص)!] مومنو ښځو ته ووايه: چي خپلې سترګې تر كنټرول لاندې وساتي او د خپلو شرم ځايونو ساتنه وکړي.  او خپله ځان جوړونه او سينګار دې نه ښكاره كوي، پرته له هغه چې په خپله څرګند شي، او پر خپلو سينو دې د خپلو پوړنو پلوونه واچوي. هغوى دې سينګار له دغو خلکو پرته بل چا ته نه ښكاره كوي: مېړونه، پلرونه، د مېړه پلرونه، خپل زامن، د مېړونو زامن (بنزيان)، وروڼه، ورېرونه، خوریان، د خپلې طبعې ښځې، خپل مملوك، خپل هغه لاس لاندې نارينه چې ښځو ته حاجت نه لري او هغه ماشومان چې لا تر اوسه پورې د ښځو له پټو خبرو سره اشنا شوي نه وي، یعني په دغو ماشومانو کي جنسي غریزې نه وي را ژوندۍ شوي. [سورة النور : 31]

رسول الله صلی الله علیه وسلم فرمایي:

«إِنَّ الْجَارِيَةَ إِذَا حَاضَتْ لَمْ يَصْلُحْ أَنْ يُرَى مِنْهَا إِلا وَجْهُهَا وَيَدَاهَا إِلَى الْمَفْصِل»

ژباړه: کله چې یوه نجلۍ بلوغ ته ورسي (مياشتينی عادت يې پيل شي)، نو نه ښايي چې پرته له مخ او لاسونو تر مړونده د هغې نور ځای ولیدل شي. [رواه ابو داود]

1. 6.    ځينې خلک د دې ښودلو هڅه کوي چې تر اسلامي دولت لاندې به د ښځو او نورو ژوند داسې وي لکه اوس په ایران کې؛ په داسې حال کې چې د ایران تئوکرات - جمهوري – پارلماني – سیاسي نظام د تش په نوم "معظم رهبر" او آخوندانو لخوا اداره کېږي او په اسلامي نصوصو کې هېڅ اساس نه لري. بلکې، په اسلام کې د حکومتولۍ موډل د قرآن او سنتو لخوا روښانه تعریف شوی چې د نبوت پر منهج خلافت دی؛ خلافت یو داسې ټاکل شوی رهبر لري چې د خلکو پر وړاندې مسول دی او د تش په نوم آخوندانو د امر او دېکتې پر ځای، د قرآن او سنتو پر بنسټ حکومت کوي.
2. ایراني رژیم مطلق اقتدار غوښتونکې رهبري لري او باید په اسلامی هېوادونو کې د نورو دېکتاتوري او نا اسلامي رژیمونو په څېر له منځه لاړ شي. هغه لاریونوال په غلطه روان دي چې د ایران راتلونکي لپاره لیبرال ارزښتونه غواړي او په دې باور لري چې لیبرال ارزښتونه د ښځو او نورو لپاره نیکمرغي راوړي. موږ په غرب او نورو ځايونو کې لیبرال دولتونه وینو چې له یوه بحران څخه په بل کې ډوبيږي او له لویو ټولنيزو او رواني ستونزو سره مخ دي. د ښځو پر وړاندې پراخ تاوتریخوالی او د کورني نظم پاشل کېدو سونامي يې بیلګې دي. په اروپايي اتحاديه کې له دریو ښځو څخه یوه یې د تاوتریخوالي قرباني شوې، همداسې له دوو څخه یوې یې جنسي تيری تجربه کړی (اروپايي کمېسیون). په فرانسه کې په هرو دريو ورځو کې یوه ښځه د خپل تېر یا اوسني ژوند-ملګري لخوا وژل کیږي ( ګارډین، ۲۰۱۹)، همداسې په امریکا کې د کورني تاوتریخوالي له امله هره ورځ نږدې درې ښځې وژل کیږي (Bureau of Justice). دا ټول د لیبرال ارزښتونو لکه فردي او جنسي آزادیو پایله ده چې نارینه د خپل فردپاله هوس او غریزې اشباع کولو ته هڅوي. همدارنګه روښانه ټولنیز ارزښتونه نشته چې د ښځې او نارینه ترمنځ اړيکه تنظیم کړي، په ټولنه او کورني ژوند کې د هغوی حقونه او مکلفیتونه روښانه کړي ترڅو په ټولنه کې د نارینه او ښځې ترمنځ د سالمې همکارۍ پر بنسټ با ارزښته او  له درناوي ډکه اړيکه رامنځته شي. په ټولنه کې د ښځې او نارینه ترمنځ سالمه همکاري ده چې د اسلام ټولنیز اصول، چې حجاب یې یوه برخه ده، یې د لاسته راوړلو په لټه کې دي.
3. يوازنۍ لاره چې د ښځو او نورو لپاره په ایران یا نورو اسلامي هېوادونو کې روښانه راتلونکی رامنځته کوي، د نبوت پر منهج خلافت لخوا د اسلام پوره او سم پلي کول دي. څوک چې دا نظام سم او له ښکېلاکي افسانو او دروغو پرته مطالعه کړي، پوهېږي چې د دغه نظام تر حاکمیت لاندې په ټولنه کې ښځو ته څومره درناوی شته؛ ښځې له تاوتریخوالي څخه ژغوري او د الله له لوري ورکړل شوي ټول سیاسي، اقتصادي، ښوونیز، قانوني او ټولنیز حقوق يې خوندي کوي. دا هغه حقونه دي چې حکام یې تر پښو نه شي لاندې کولی؛ ځکه چې الله تعالی ورکړي. دا د سیکولر دولتونو، لکه، فرانسې، ډنمارک، بلجیم او هالنډ پر خلاف دي چې پر حجاب د بندیز په سبب یې مسلمانې ښځې له خپلو ښوونیزو، اقتصادي او نورو حقونو بې برخې کړې. د مسلمانانو په توګه، باید دا ومنو چې څو مو د خپل خالق سبحانه و تعالی احکامو، قوانینو او نظام ته پوره غاړه نه وي اېښې، نه به په دنیا کې بریالي شو او نه په اخرت کې.

(يَا أَيُّهَا الَّذِينَ آمَنُواْ اتَّقُواْ اللّهَ وَابْتَغُواْ إِلَيهِ الْوَسِيلَةَ وَجَاهِدُواْ فِي سَبِيلِهِ لَعَلَّكُمْ تُفْلِحُونَ)

ژباړه: اې مؤمنانو! له الله څخه ووېرېږئ او د هغه په حضور کې د مشرف كېدو وسيله ولټوئ او د هغه په لاره کې جهاد وکړئ. ښايي چې تاسې ته برياليتوب در په برخه شي. [سوره المائده : 35]

د حزب التحریر مرکزي مطبوعاتي دفتر ته

ډاکټر نسرین نواز

د حزب التحریر مرکزي مطبوعاتي دفتر د ښځو څانګې مشره